المطبخ كابوس لا ينتهى!!!!! بس أكيد فى حل :)

 مين فينا مبيشتكيش من المطبخ  و السؤال اللى بيتكرر كل يوم و للأسف ملوش اجابة (هتاكلو ايه النهارده ) ارهاق و مجهود ذهنى رهيب محدش حاسس بية و محدش حاسس اد اية ده فعلا مجهود و تضييع رهيب للوقت بس انا النهارده هقولك على حبة حلول تخلى وقت المطبخ أقل كتير مكن ساعة كل يوم او حتى أقل و هحللك مشكلة هتاكلو ايه النهاردة و هتوفرى فى ميزانية البيت و فعلا عمرك مش هيضيع فى الطبيخ .

أول خطوة لأى عامل ناجح مش بس الشغل أو اى حاجه فى حياتك هى التنظيم و ترتيب الافكار , طيب ده هنطبقة فى المطبخ بأنك هتجيبى ورقة و قلم و تكتبى ايه الاكلات اللى انتو بتاكلوها تقريبا طول الشهر و اية الحجات اللى بتحبوها ( انا بفضل الاكلات اللى سهل تتعمل مش صوانى و محاشى دى تفاريح انما مش علطول ,استثمارا للوقت ) المهم هتعمللى عصف ذهنى و لو ولادك كبار خليهم يشاركوكى فى الاختيارات و لو جوزك بيحب الاكل و بيحب يختار هياكل ايه خليه هو كمان يشاركك فى الحجات اللى بتحبو تكلوها 

حضرتى الورقة هتبتدى تحطى خطة للطبيخ طول الشهر ( ايوه زى مقريتى طول الشهر ) بحيث ان انتى تبقى عارفة علطول هتطبخى اية و مظبطة نفسك على أساسة و تعلقى الورقة فى مكان واضح مثلا على التلاجة

و بكده مش هتبقى محتارة كل يوم أية الاكل وده جزء كبير من المشكلة أتحل طيب الورقة دى هتفيدك فى اية : دى هتخليكى 

مظبطة نفسك و مجهزة كل حاجة مسبقا بمعنى انك شهريا هتبقى عارفة بالظبط احتياجاتك و اية اللى هتتطبخى بية فهتقدرى تجيبية مرة واحده و بيتك هيبقى جاهز و مش كل شوية هتكلمى السوبر ماركت او تنزلى علشان تجيبى لوازم الطبيخ و هتختفى كمة هاتلنا و انتا جى 

و كمان الطريقة دى هتخليكى لما تنزلى السوبر ماركت هتجيبى احتياجاتك بس مش هتجيبى حجات كتير ملهاش لزمة او حجات هتفتكرى انك محتاجاها و فى الاخر متستخدمش لانك هتبقى عارفة بالظبط انتى محتاجة اية و بكده كمان هتقدرى تتحكمى فى ميزانيتك 

الورقة دى كمان هتوفر عليكى مجهود رهيب فى انك مثلا ناوية تطبخى فى يوم يسلة و يوم تانى بامية اطبخى الاتنين سوا و شيلى الطبخة التانية فى الفريزر لو هتجيبى فراخ هتبلى و هتسلقى مرة واحده كلة لانك عارفة بالظبط انتى هتعملى اية هتلاقى نفسك كتير الحاجة جهزة يدوبك ناقصة على التسوية  او التسخين

ودى الورقة مليانة للى حابب ياخد منها أفكار تساعدك فى كتابة الجدول 

و لو حابة تطبعى الورقة فاضية و تمليها ممكن تلاقيها من هنا

طيب حبة حجات بقى بعملها بتوفر وقت رهيب فى المطبخ و بتخلى وقت المطبخ اقل 

1. لما بفرم بصل او ثوم مش بفرم لطبخة واحدة لكذا طبخة و بشيل فى الفريزر 
2. الفراخ بتتنضف و تتبل كلها مرة واحدة و تتشال لو هسلق بردو كذا واحدة مرة واحدة و الشوربة تتشال 
3. الصلصة تتحضر كتير و تتقسم و تتشال 
4. الخضار يتغسل مرة واحدة كل اسبوع 
5. لو واقفة بعمل حاجة فى المطبخ أعمل حجتين 3 فى نفس التوقيت و أشيل
6. بشيل الرز محمر فى الفريزر
7. اللحمة المفرومة اما تتعصج او تتعمل كفتة و تتشال جاهزة على التسوية

.ففى الاخر بلاقى يومين 3 مجهود كبير و بعد كدة المطبخ و الطبيخ جاهز فى 10 دقايق باقى الشهر 

و دى كانت مجرد أفكار بسيطة و أن شاء الله هسرد أفكار لتنظيم الخزين  أزاى تشترى حاجة البيت و أزاى تروقى المطبخ و يبقى وقت سهل بأذن الله 

ممكن كمان تتطلعى على بعض الافكار من موقع home management 

من هنا