هنعمل ايه اول 3 شهور فى عمر الطفل ؟

اول 3 شهور اكتر حاجه بنحاول نعملها اننا نحسس الطفل بالامان لانو بيبقى خايف من الرحله اللى مر بيها فبنحاول فى كل الانشطه يكون هدفها الامان
اللى فى الصوره دول montessori baby mobiles
عليقات بتتعلق للطفل و بتتغير كل اسبوعين من تانى اسبوع من ميلاد الطفل انا بصراحه معملتش الا اول 3
طبعا هنكلم البيبى كتير علشان يسمع صوت مامته ده هيحسسو بالامان جدا
احضان كتير و مساج كتير و كده و علشان خطرى بلاش اول ميتولد يتساب يعيط لحد اما يتفلق كده الطفل بيتشد اكتر و بيخاف و هيعيط اكتر الموضوع مرهق انا عارفه و بيجى عليا اوقات ببقى عايزه احدف عيالى من الشباك بس بقول لنفسى انو لسه نونو و اكيد محتاجنى
حاجه تانيه ممكن نعملها نهز الطفل و هشتكه خفيه كانك قاعده على كرسى هزاز ده هيساعده 

اسرع على الاتزان

انتو طبعا عارفين ان حواس الطفل لما بيتولد بتكون لسه مش قويه يعنى لو اول متولد سمع و شاف و حس بكل حاجه بنفس القوه هينهار المهم نظر الطفل اول مبيتولد مبيبقاش قوى و بيبقى مزغلل فعلشان يطمن بنحطله صور و حجات كلها ابيض و اسود جنب بعض فبكده بنقوى نظره , و يثق فى العالم حواليه علشان كده عملت كورنر فى البيت عباره عن فرخين نصبيان و لزقت عليهم مربعات من فرخ اسود عادى بحيث تبقى عامله زى الشطرنج و اسمها checker board من كتاب how smart is your baby البورد دى بتتحط علطول حولين الطفل فبتاثر على الحاسة النظر و بتنشطها انا اه مكملتش استخدام البورد زى مفى الكتاب و المراحل بتاعتها انما كنت بحاول قدر الامكان انها تتشاف , كمان كنت بخلى بناتى يشوفو صور ابيض و اسود كتير و بولع و اطفى النور و ده اسمو sensory stimulation لحاسة النظر طبعا الوقت ده بردو نلمس الطفل كتير و نتكلم كتير علشان نحفز الاحساس و السمع كمان

راحتى كانت من اهم الحجات اللى كنت بسعالها من اول مخلفت بحاول بقدر الامكان اسهل عليا الروتين اليومى علشان اقدر اكمل و اعمل انشطه و مبقاش مضغوطه و من اهمها الغيار انا جبت مرتبة غيار و دى مكنشسعرها غالى حوالى 200 جينيه و عملت ليها رف عالى فى الحيطه بكده مبقتش بوطى و بتعب دهرى و حطيت تحتيه سبت غسيل بحيث علطول نقلع الهدوم احطها فى السبت و كمان باسكيت ارمى البامبرز اللى مش نظيف و عملت رف تانى فوق احط فيه الحجات اللى محتاجاها للغيار انا عارفه ان فى فيشه و ده مش المكان الامثل بس ده المكان اللى قريب من الحمام للغيار و المناسب لشقتى

أأهم حاجه فى الشهور الاولى الامان متسيبيهوش يتفلق الفتره دى انا عارفه انها صعبه و مجهده بس حاولى و متخافيش ان شاء الله هتعدى بسرعة 

ليه نصيحه لو هترضعى باليل دايما شغلى باليل سهرايه او نور خافت و اوعى يبقى هشتكه و لعب و انوار عاليه باليل و بالنهار يبقى النور داخل و يبقى فى لعب و كلام كتير دا هيساعد الطفل بسرعه انو يقدر يفرق بين اليل و النهار فميغلبكيش فى النوم ان شاء الله و اوعى تخلى باليل لعب علشان متتعبيش بعدين