ليه أخترت انى اهتم بنفسى و أتكلم عن الموضوع ده

بعد مخلفت بنتى الاولى حبيبة بحوالى 6 شهور أكتشفت أنى حامل تانى فى بنتى التانية نور و عدت شهور الحمل الصعبة و طبعا مع كل يوم شكلى كان بيتغير و ببقى شبه عفريت العلبة اكتر لحد اما جت اللحظه و قلت خلاص هخلص من الوجع و التعب و خلفت لقيت نفسى داخله فى دوامة عياط و غيار و تنضيف و غيرو و كل شوية ابص لولادى و ابص لشكلى انا ازاى بقيت كده 

بقيت كأيبه و نكدية الى اقصى درجة و حسيت انى فجأه ضيعت شبابى فى ايدى بس 

بعد فترة من البحث ازاى فى امهات بتقضى حياتها كده , ازاى فى ناس بتستحمل كل ده لأ و مكملين و عايشين و كمان مبسوطين أكيد كان فى سر 

لقيت كتير منهم مبيهملوش فى نفسهم الموضوع ده و ان كان بعيد عن التعليم المنزلى الا انو بيفرق فى نفسية الام اللى بترتاح و بتبقى مبسوطه فبتعرف تدى اللى حواليها 

كان فى بوست لراجل مصرى كان بيقول فيه ان جواز الست السورية أفضل مليوم مره من الست المصرية لأن المصرية مبتهتمش بنفسها و الموضوع مش شكل بس ده اهتام بصحتها و لعب الرياضه و حتى تبقى ناعمه و رقيقة و بالرغم من ان البوست ده كان ظالم جدا للست المصرية بسبب كمية الضغوط و الاعباء الرهيبه اللى المجتمع المصرى فارضها عليها الى انى بشكل ما فكرت فى الكلام اللى الراجل كاتبه ازاى انا سنى و شكلى بعد مخلفت بقى اكبر من عمرى الحقيقى ب 10 سنين حتى صحابى بقو بيوبخونى و بيقولوو قلت لنفسى  انتى ازاى بقيتى كده و كمان انا كنت بتابع مشكلات الزوجات فى الجروبات بتاعة المشاكل و للاسف معظم المشاكل بيبقى بس حلها انبسطى و خلى ليكى حياتك المستقلة و اهتمى بنفسك

بس رد كتير من الستات اهتم بنفسى ازاى و الميزانيه لا تسمح بالكوافير و السبا مره ولا مرتين مش فى الاسبوع لا فى الشهر و اروح الجيم ده كده انا محتاجه ميزانيه لوحدى البيت اولى و للاسف ده كان رد كتير قوى من الستات و المتحيزين ليهمم و علشان بردو ابقى واضحة فى وجهة نظرى انا مش بقول اهتمى بنفسك علشان حد بس علشان خاطر نفسك و نفسيتك كأنثى 

المهم انا من الناس اللى بتكره الكيماويات و مقتنعه تماما ان اى كيماويات مهما كانت مفيده ففى نسبة ضرر بتحققها ففكرة انى اقضل اشترى فى كريمات و طبعا لازم الغالى منها علشان مأصبش بضرر فكره مرفوضه و نزول الكوافير كل اسبوع علشان الاهتمام ده كان محتاج ميزانية ضخمه جدا 

فكان لازم ادور على حلول صحية و متكنش مدمرة زى الكريمات الغالية و المركات 

كان لازم اتعلم خطوات الاهتمام بنفسى و بصحتى و ببشرتى و طبعا كل الحجات دى لازم اشوف انعكاسها النفسى عليا ايه

و سبحان الله حجات كتير قوى كان التاثير بتاعها خيالى لدرجة انو كان ملحوظ من ناس كتير حولية و فاد نفسيتى و بقيت أم افضل 

علشان كده حبيت اشارك كل ام انا عملت ايه و اد ايه الموضوع طلع بسيط و ان التغيير البسيط ده ممكن يأدى لنتايج ضخمة بعد كده و مش بس كده الموضوع كله ممكن يكلفك حوالى 300 جينيه يكفوكى شهور و يظبطولك كل حاجه ممكن تتخيليها من حبة حجات من عند العطار او أمتنان و ان كنت بفضل أمتنان علشان الحاجه تبقى مضمونه انما ان متيسرش فالعطار عيفى بالغرض 

المكونات اللى بستخدمها لكل حاجه من طرق الاهتمام بالنفس كالاتى 

زيت جوز هند بكر ( و ده للاسف اغلاهم البرطمان نص كيلو ب 100 جينيه من امتنان ) و

زيت لوز حلو 

زيت جوجوبا 

جل صبار 

زيت زيتون 

خل تفاح 

باقى الحجات بتبقى حجات موجوده فى البيت زى القهوة و الشوفان و الزبادى العسل و غيرو 

انا بس حابه اوضح حاجه انا مبستعملش اى تركيبات معقده دى كلها حجات بسيطه و هشرح انا ازاى بستعمل الحجات دى و فوايدها و تاثيرها فى مقالات منفصلة ان شاء الله 

أهم حاجه نفسى اوصلها ان انتى كأم تستحقى حجات كتير اهمهم انك تقدرى نفسك و تعرفى ايه اللى هيبسطك وده من الخلال التجربه جربى تهتمى بنفسك و جربى هوايات جديده جربى حجات كتير ( و مش شرط تكون مكلفة ) لحد اما توصلى للى فعلا بيبسطك و لما هتبقى مبسوطه فعلا هتعرفى تبسطى كل اللى حواليكى و باقل مجهود ممكن تعمليه اما لو انتى نسيتى نفسك مهما حاولتى للاسف مش هتعرفى تسعديهم لان ببساطه فاقد الشئ لا يعطيه 

و اخر حاجه أوعى تسيبى ساعدتك فايد حد مهما كان زوج او ابن لازم تكون ساعدك نابعه منك انتى من خلال معرفتك بذاتك و للاسف كتير مننا مبيبقاش متخيل ده و لما اللى حوالينا مبيدوناش الهتمام و الرعاية اللى بنتمناها بننهار و ده للاسف لاننا حطينا سعادتنا فى ايدهم هما بس فى حين ان المفروض سعادتنا تكون نابعة من علاقتنا بربنا ليس الا ,لانو هو الوحيد اللى عمره مهينقلب علينا او هيكرهنا و كل اما هنحسن علاقتنا بيه كل اما ابواب السعاده كلها هتنفتح لنا 

أن شاء الله المقالات القادمة هتكلم عن الروتين للعناية بالنفس و ازاى بالمكونات دى ممكن فعلا نعالج اى مشاكل فى بشرتنا و شكلنا تابعونا   

,