كيف تحتفظى بعقلك و انت أم و ربة منزل !!!!!!

حاجة بيستغربها ناس كتير حوليه أنى رافضة انى أشتغل خارج البيت و انى مستمتعة بكونى أم لطفلتين لسة متموش حتى 3 سنين و ده طبعا بيخلى نظرات الاستغراب قوية جدا من صحابى اللى بيشتغلو او حتى صحابى اللى عندهم اطفال صغيرين و منتظرين .الفرصة المناسبة علشان يسيبو البيت و يروحو الشغل 

مش هضحك عليكو أنا طبعا بيجى عليا اوقات بتعب و بحس أنى مليش اى لزمة فى الحياة غير انى أغير حفاضة و أأكل و أنيم الكائنات الزنانة دى !!!!!!!(أنا بحبهم جدا مش بقول حاجة ) 

 توصلت  ان فى حبة عادات لما بعملها الاحساس الصعب ده بيروح او بيقل جدا و بلاقى نفسى فعلا مستمتعة بيهم و معاهم وعندى طاقه اعمل حجات كتير و طبعا ببقى اهدى و اروق و مش بزعق و بتخانق مع دبان وشى 

أى ست قررت انها تقعد فى البيت بتواجه مشكلتين كبار هما الكسل و الاكتأب و دول للاسف بيبقو سبب كبير ان ستات كتير يكرهو البيت بسببهم و هنا حبيت اشاركو حبة عادات بتحد من الحجتين دول جدا و بتخلى القعاده فى البيت ذات قيمه كبيره جدا أهمها ان انتى مش بس بتربى ولادك انتى بتبنى مجتمع 

و هنا حبيت اشاركو العادات دى !!!

الدعاء

الدعاء ده لازم يكون جزء لا يتجزء من اليوم تدعلى ربنا انو يعينك على اليوم و التعب و يوفقك فالى ناويه تعمليه و يباركلك فى , ولادك و فى يومك و فى صحتك و يقدرك انك تتحملى الصعاب و التحديات اللى هتعدى عليكى خلال اليوم

أصحى بدرى

غير ان فى البكور بركة و كل الحجات المهمة للصحة فى الصحيان بدرى انا هنا هتكلم عن حاجة تانية خالص , الصحيان بدرى ده اكتر حاجه هتحافظ على قواقى العقلية لانك هتستمتعى بالجلوس فى هدوء هتلاقى وقت ترتبى فى يومك و تخططيله , هتلاقى وقت تشربى كوباية شاى فى هدوء منغير متتنتش منك او تسمعى كلمة ماما 16 مرة فى الدقيقة 

ساعة بدرى قبل مولادك يصحو كفيلة انها تغيرلك حياتك بس نصيحتى صلى الفجر و خليكى صاحيه هيفرق فعلا فى حياتك كتير 

ألعبى رياضة 

وهنا انا مش بقولك العبى ساعة ولا انزلى جيم ولا اى حاجه ده انا بقولك طلعى كام تمرين من على النت اعمليه فى فتره مثلا 10 دقائق حاجه كده يدوبك تمشى الدوره الدموية و يديكى نشاط طبعا لو انتى بتحبى الرياضه و هتلعبى اكتر علشان صحتك اكيد يكون افضل بس لو لا زى حلاتى يبقى 10 دقايق كل يوم هيدوكى نشاط زى لاعيب الكره مينفعش يخش المتش منغير ميسخن انتى كمان سخنى قبل متبدأى يومك 

الاكل

كلى اكل صحى سلاطة و فاكهه و حطى فى يوك الاكل اللى بيحارب الاكتأب زى الموز و الشكولاتة بس متكليش منهم كتير علشان سعراتهم عالية 

البسى كل يوم الصبح 

كل يوم الصبح غيرى لبسك و جهزى نفسك كأنك خارجة , البسى و استعدى لليوم أكيد هتلبسى لبس مريح بس يبقى موضب , حطى مكياج ,ظبطى نفسك , اعملى روتين للاهتمام ببشرتك و بشكلك انا عن نفسى عاملة روتين الصبح و بليل ترطيب لوشى و الكلام ده مش محتاج ميزانيات ضخمة ده حجات موجودة طبيعى فى البيت و الروتين بتاعى هشرحه فى موضوع منفصل ان شاء الله انما هنا انا كل اللى عايزاكى تعمليه انك تبدأى يومك كأنك نازله الشغل مش قاعدة بالجلبيه او البيجاما دا هيخليكى تكسلى عن حجات كتير عايزه تعمليها و فعلا الحجات دى بتفرق جدا فى نفسيتى و يمكن نفسية امهات كتير قررو انهم يستمرو فى البيت 

أحتيجاتك هى اهم اولوياتك 

أحتيجاتك النفسية مهم جدا و فى قاعدة لازم تفضل فى دماغك طول الوقت لو انت مش مبسوطه مش هتعرفى تبسطى حد و مش هتعرفى تهتمى بحد فديما خلى بالك من نفسك اعرفى ايه بيضايقك و ايه بيبسطك أعرفى هوياتك اكتشفى نفسك بعيد عن ولادك و جوزك فكرى فى نفسك ساعتها بس هتعرفى تسعدى اللى حواليكى و بلاش جو السوبر ماما اللى بتعمل كل حاجة و هى اللى بتقدر بس انتى كده بتنسفى نفسك و بتجيبى لروحك اكتأب بدرى بدرى , انتى محتاجة راحة و بشكل منتظم كل يوم و كل أسبوع 

فى اليوم الواحد بترتاحى الصبح قبل مالولاد يصحو و ترتاحى تانى وقت غداكى اعمليه وقت راحة و بليل لما جوزك يرجع سبيله الولاد و ارتاحى شويه طبعا كل واحد ادرى بظروفه و بالسبل اللى يقدر يرتاح بيها 

كل اسبوع سيبى الولاد مع جوزك , والدتك , واحده صحبتك اى حد و انزلى ساعتين كلى ايس كريم او اشتريلك حاجه و متستهونيش بالحجات دى والله هتفرق و هتلاقى اللى حواليكى بيساعدوكى على ده لما هيلاقو تصرفاتك و طريقة كلامك و اسلوبك بقى احسن و عصبيتك قلت كتير المفتاح كله فى معرفتك لنفسك 

سجلى هدفك 

كلنا عايشين علشان نعبد ربنا (وَمَا خَلَقْتُ الْجِنَّ وَالأِنْسَ إِلاَّ لِيَعْبُدُونِ) صدق الله العظيم 

و بالتالى جو انا عايشة علشان ولادى والكلام ده بيدمر علشان لو ربنا مأردش ان ولادك يطلعو ذرية صالحة لا قدر الله او جرالهم اى حاجه بعد الشر انتى متموتيش بحصرتك بس ربنا امرنا ان احنا نربى ولادنا و نتعب معاهم بس لالنتيجة دى بس بأيد ربنا سبحانه و تعالى كل اللى بقصده هنا انك لازم يكون ليكى اهداف فى حياتك بعيده عن ولادك و اهداف مع ولادك اهداف تساعدك تعيشى حياتك بشكل سليم انا مثلا ان شاء الله ناويه اتعلم الخياطة يمكن مش هقدر دلوقتى انما فى الخطه عندى اهداف فى دينى انى اتعلم شريعه و توحيد و غيرو عندى اهداف كتير فى حياتى و هسعى انى احققها طول مفيه نفس .و الهدف المكتوب الطريق ليه بيبقى واضح و افضل الف مره من انك تبقى عايشه كده و خلاص كل يوم زى اللى قبله منغير هدف

أقرى كتير 

أقرى عن كل حاجه , أقرى تاريخ و جغرافيا و علوم أقرى دين و شوفى فيديوهات علميه كل اما هتقى و هتتعلمى ده هيوسع مداركك مش بس تقرى عن التربيه أقرى عن كل حاجه نظرتك لامور كتير حواليكى هتختلف لو بس بدأتى تقرى يمكن لما يكون لسه عندك اطفال صغيرين الوقت هيكون صعب بس كل اما هيكبرو الوضع هيكون افضل دا حتى ماريا مونتيسورى بتقول خصصى وقت كل يوم انتى تقرى لوحدك وولادك يبقو شايفينك علشان يكبرو و هما مقدرين اهمية القراءه و يطلعو بيحبوها هما كمان 

أهتمى بنفسك و بشكلك و بصحتك انتى عمود البيت منغيرك كل حاجه بتبوظ و مش لازم علفكره الموضوع يبقى مكلف وده هشرحه بعد كده 

أخر حاجه فكك من كلام الناس اللى ولا بيودى ولا بيجيب أشتغلتى مشتغلتيش ولادك اجتماعيين ولادك أنطوائيين ولادك فيهم العبر متسمعيش كلام حد غير اللى فعلا يكون مقنع بالنسبالك و المشاكل اللى انتى فعلا شيفاها و بتحاولى فعلا تحليها محدش عايش معاكى شايف انتى بتتعبى قد ايه كفئى نفسك , نفسك تستحق و فكك من كلام الناس