لية اخترت التعليم المنزلى لبناتى ؟؟؟؟؟

ان الهدف حين لا يكون واضحا و محددا فانه لا يحفز صاحبه على العمل و العطاء و بذل الجهد (عبد الكريم بكار ) لذلك اردت ان 

اسجل لماذا اخترت الطريق ده رغم المشقه و التحديات اللى فيه 

اول سبب حفاظا منى على عمر ولادى و تقديرا منى لقيمة الوقت 

هنا انا مقصدش انهم هيخدو السنه فى سنتين انما بتكلم عن عمر ووقت طويل بيضيع بين طوابير و حصص ممله و ايام كتير بتمر فعلا و متلاقيش اى استفادة حقيقية منها 

فى حجات كتير ممكن تدرس فى شهر هما بيعودو فيها شهور و فى المقابل بحرمهم من حقهم فى اللعب و اكتشاف العالم الحقيقى اللى بره المدرسة 

المستوى التعليمى 

طبعا لا يخفى على اى حد ان مصر من أسواء الدول فى مستوى التعليم و اذا مكنتش هوفر لولادى دخول مدرسة من اللى مصاريفها تتراوح من 80 ل 100 الف جينيه (رغم مساوأهم الاخلاقية بس ده شق تانى ) فتعليمهم فى اى مدرسة حتى لو كانت خاصة بيكون ظلم كبير ليهم 

انا كنت مبقراش اى حاجه غير مناهجى الدراسية و لما وصلت الجامعة قررت اجيب كتاب تاريخ مشهور و هنا فضلت حولى شهر مصدومه من اللى قريته لما حسيت ان كل او معظم ما تعلمته كام مسيس و مغلوط و على احسن الظروف ينقص كتير قوى ساعتها حسيت قوى انى متعلمتش رغم كونى من المتفوقين طوال عمرى وده سبب كافى انى اقرر لولادى انهم يتعلمو صح ميضيعوش عمرهم فى حل الواجب اللى ملوش اى لزمه غير وجع صوابعهم 

لا يخفى على احد بردو المستوى الاخلاقى و العنصريه الرهيبه اللى اصبحت فى المجتمع و كل اللىكنت عوزاه انى ارسخ بعض المفاهيم الاخلاقيه و الدينيه و اخليها ارض صلبه علشان يعرفو يواجهوو بيها المجتمع بدل ميتشكلو باخلاق فجه يصعب اصلاحها مع   الوقت و الزمن و يبقى كل اللى بيشفوه هو ده العادى 

لاسباب امنية 

فى الوضع الحالى لمصر نزول المدرسة بقى فعلا خطر من كل اللى بنسمعه عن انتهاكات جنسية للاطفال و خطف و بلاوى كتير ملهاش اول من اخر 

حاجه تانية نفسى ازرعها فى ولادى ان تقييمهم للناس مش معاهم او بيملكو ايه انما تقيمهم بدا اخلاقو و شخصيته عامله ازاى و نفس الحكاية فى تقيمهم لنفسهم 

اخر حاجه التعليم النظامى مبيراعيش انماط التعلم و اختلاف كل شخص عن التانى فى الطريقه اللى بيستوعبو بيها و بيتعاملو مع كل الطلبه على انهم متلقين مع اختلاف قدراتهم 

و لسبب اخر ان ابنه من بناتى بها متلازمة داون و بالرغم من حقها فى الدمج و التعلم فى المدرسة مع اقرانها الاصحاء الا ان كتير من القصص حوليه بتشرح كم العنصريه و النقض و عدم استيعاب لقدراتها مبالغ فيه او تهميشها او التقليل من امكانيتها مما يجعل المدرسة بالنسبه ليها ضرر اكثر من النفع 

و غيرو و غيرو من الاسباب اللى لا تنتهى انا عارفه ان علشان الاحلام دى تتحقق محتاجه صبر و جهد و تعب انما مع وضوح الاسباب ان شاء الله الطريق هيبقى سهل و يمكن مش كل احلامى تحقق انما بينى و بين نفسى هقول لربى انى فعلت قدر استطاعتى لكى احافظ على النعمه التى انعمت على بيها   اولادى لبنه فى بناء تلك الامة 

طيب يجى بقى سؤال مفيش ام و انا كنت واحده من اللى علطول بيسألوه يعنى هتحبسيهم فى البيت !! يعنى انتى اللى هتعلمى كل حاجه !!!!! الولاد هيطلعو انطوائيين

اجاوب و هقول لا مش شرط انى انا اللى هعلم كل حاجه ياما فى مدرسين و ما اكثر الدروس الخصوصية فى بلدنا يمكن فى السن الصغير مش هحتاج انما اول مهحتاج اكيد مش هتاخر

الجانب الاختماعى فى كذا وسيلة اولهم الرياضه و صحاب التمرين و بمتابعة صحابى اللى كانو بيتمرنو من صغرهم او جرانى اللى عندهم اطفال بيتمرنو فاصدقاء التمرين ما اكثرهم و كمان بيبقو دايمين بيتشاركو السعاده سوا 

و بدأت اتعرف على امهات لهم نفس الفكر و ساكنين بجوارى اولادهم فى عمر اولادى مش بس علشان ولادنا يجتمعو مع بعض لا دا كمان علشان نوفر دعم نسى لينا احنا ككبار هنتولى عملية التعليم و كل اما الولاد هيكبرو هيبقى فى انشطه و كشافه و مجالات كتير مبتسعش الاطفال فى لمدرسه انهم ينضمو ليها ان شاء الله اقدر اربط ولادى بيها و بكده هتبقى حياتهم الاجتماعية سليمه و مع ذلك حبه اوضح ان الامر ده اكيد مش سهل و هيحتاج تعب و الله المستعان 

دى اسباى فى اختيار التعليم المنزلى و كل واحد هيكون ليه اسبا مختلفه عن التانى اهم حاجه للى بتفكر تمشى فى الطريق ده تسجل اسبابها علشان كل اما تنهار او تحس ان الطريق صعب تفتكر هى ليه اختارت الطريق ده من البداية فتسهل عليها المشوار و أسال الله التوفيق لان منغير توفيق ربنا لا شئ ينجح .

         دمتم فى امان الله